ബംഗളൂരു: ബംഗളൂരു യെലഹങ്ക ഫാകിർ കോളനിയിലെ കുടിയൊഴിപ്പിക്കൽ സംബന്ധിച്ച് കോൺഗ്രസ് ജനറൽ സെക്രട്ടറി കെ.സി. വേണുഗോപാൽ നടത്തിയ പരാമർശങ്ങളെ വിമർശിച്ച് ബിജെപി. വേണുഗോപാൽ കർണാടകയുടെ സൂപ്പർ മുഖ്യമന്ത്രിയാണോ എന്ന് ചോദിച്ച പ്രതിപക്ഷ നേതാവ് ആർ. അശോക, സംസ്ഥാനത്തിനു സ്വാതന്ത്ര്യവും ബഹുമാനവും നൽകണമെന്നും ‘ഹൈക്കമാൻഡ് നാട്യങ്ങൾ’ ആവശ്യമില്ലെന്നും പറഞ്ഞു.
“രാഹുൽ ഗാന്ധിയുടെയും കൂട്ടാളികളുടെയും കോളനിയല്ല കർണാടക. ഡൽഹിയിൽനിന്നുള്ള നിർദേശങ്ങൾ പ്രകാരമല്ല കർണാടക സർക്കാർ പ്രവർത്തിക്കേണ്ടത്.
കേരളത്തിൽനിന്നുള്ള മെഡിക്കൽ മാലിന്യങ്ങൾ ബന്ദിപുർ വനമേഖലയിലടക്കം തള്ളിയപ്പോൾ പോലും വേണുഗോപാൽ ഇത്തരത്തിൽ ഇടപെടാൻ കൂട്ടാക്കിയിട്ടില്ല’’- അശോക പറഞ്ഞു.